辦年貨

嘩咁快又新年啦

好似自從讀中學之後，時間就過得特別快咁
其實除左豆利是之外，不嬲對新年都無咩感覺。
不過人越大越珍惜同親人見面既時間，
所以今年自己都比以前更重視新年，自己買左d拜年禮物同全盒朱古力。

由於我地只會去阿叔屋企拜年(今年唔去，要溫書)，但裡面聚集左十幾個親戚(囧)
我今次就係agnès b. DÉLICES買左曲奇同朱古力(其實都係諗住買俾班細路即埸食)
朱古力揀左呢盒

其實朱古力佢地都有出新年紅色禮盒個d，不過我覺得無咁靚就無揀到。

仲買左盒曲奇餅，聽聞雪左仲好食。
甜野最岩細路食，長輩歎茶又岩，所以就買埋

買夠$300仲送利是封
好靚呀，但唔知點解印兔仔，進貢哂俾阿麻

佢話封俾班細路岩哂(好似買咩都係俾細路咁 哈哈)

另外，尋日仲係Chocolat-ier 買左朱古力放全盒。

個度d朱古力係自己揀自己"筆"，
揀得我好開心，個度有好多唔同味道揀
仲標榜有機，低脂添，好食又健康！
撞岩新年有買300g送100g，抵！(其實400g真係幾多下)
食左幾粒，推介乳酪小紅莓朱古力酸酸甜甜咁好好食
如果好咖啡既話，朱古力咖啡豆都係推介，咖啡味真係好似湧出黎咁
仲有，個度仲有得試食，可以試岩先買！

其實買呢d野可能要洗多d錢，但新年一年都係得一次
我覺得咁洗都值得，起碼收到個個人都開心嘛！
新的一年希望大家身體健康(呢樣真係最緊要)
我亦希望自己學業進步，凡事順順利利(今年對我黎講真係好重要)！